ميشال طراد – قصائد مختارة

(1998-  1912)

( خلق بزحلي سنة 1912. عاش طفولتو بين زحلي وبسكنتا. تعيّن مسؤول عن قلعة بعلبك. تطبعلو جلنار، دولاب،ليش، كاس ع شفاف الدني. نكتب عنّو اطروحة دكتورا بالأنكليزي بجامعة كامبردج).

 

 

شلح زمبق

عا كتر ما هالزمبق شلوحو علو.
وتمايلو. صار يغلط بعدّن.
جلنار، اوعي توقفو حدّن.
بلكي ع سكرو يفتكر انك الو.

رح حلّفك بالغصن يا عصفور

رح حلفك بالغصن يا عصفور
بالورق بالفي بالنبعات
بالزيّح جناحك بريشة نور.
بالمرجحك مع زرقة النسمات

بتطير ياعصفور
عا كوخ من وزّال
غويان، سقفو زهور
مفروش بالعنبر
وحب الندي الأخضر
دني ظلال ظلال

بتقشع عريشي وباب
بفيّتا مزوي
،وحلوي بايدا كتاب
سلّم على الحلوي
وان هديت رياحك
بتمرمغ جناحك

ع السطح ع الحيطان
ع تياب مدريـّي
ع البسط ، ع القمصان
ع كل شي تخزق
ع المقعد الأزرق
ع القمر السكران
البيزكرّا فييّ

وان كان ما في شي
من حبنا باقي
بتسكت الساقي
يا طير، وبتمشي

وبتغط تحمليّ
يا من هاك التليّ
يا من هداك الغاب
شي زكر، شي قشّي/
ومن خرتشة ديها
ومن تحت اجريها
شي نقدتين تراب

أوضتا

وبعد في فيات خصر مرفرفي
ع شراشفا الزرقا وزنار القصب
وبعدها الغبرا على وجاه اللعب
وجناح بشّورا على شمعا طفي

وبرواز صورا، الدهر حفّو ونقوبو
ومزهريّي، التلج عم بيقصّفا.
والعطر دبلان بين شوالفا
وعنكبوت وورد عم يتعاتبو

وبعد في دورق نبيد، وفي كتاب
كل ما قلبتو بيعبق بالورود.
شوية حنين وذكريات من الشباب
هوني صدر عريان، هونيكي خدود.

وبساط حت وباخ، كانت تفرشو
قبال القمر، وترشرشو بالياسمين
الأربع قراني الصفر عم يتوشوشو
وعم يسألو عنك متل المجنونين

جلنار متل الحلم ايّامي معك
راحت، وهلّي راح ما منّو نوا
ودّعت قلبي يوم قلبي ودّعك
متل الغيوم العم يشلّعها الهوا

ليلة العرزال

طلّ القمر عا مقلب السلسال
لا كان، لا ع الفكر، ال ع البال
قولك حدا بيشوفنا بهالليل
مع بعضنا غالّين بالعرزال؟

لا تخاف قالتلي بغنج، لا تخاف
خيمي بقفوي، منين رح ننشاف
حوّك. شو في حدنا صفصاف
غطّا علينا، ولفنا العرزال

سمعت خشي ليك كيف قلبو هرب
هادا هوا، لأ مش هوا، هادا قصب
حاجي فزع. جوعان في عنّا عنب
ع الخدّ،زيني وع الشفاف شكال

ولمّن هلكتا: شفاف، صدر، زنود
قالت شوي شوي عالخدود
حبّي وحبّي أكلة العنقود
لا في دوالي عندنا، ولا سلال

مبارح عشنّي سمعت حدّ العين
كلمي بمعنا، من بنات تنين
شو سمعت؟ روّج قال هالعينين
يللّي الك بيوقعو الخياّل

ولمن لاقوني لا جسم، لا روح
قالو حبيبا خيال عم بيلوح
وبتتركو؟ تركهن ع فكرن، روح
مش عارفين بليلة العرزال

 

نغمشي

قدّيش هالوردي عم تكتّر حكي
وبتضلّ هي والكنار بوشوشي.
مبارح غمش عنقا بضفرو الليلكي
واليوم بفّح صدرها من الغرمشي.
شو باك، يعني، شو؟ انتي شو بكي؟
حسّيت دخلك هيك متلي بنغمشي؟