من قصائد أسعد السبعلي – شهر العنب! – نهر – الزيتوني

1998-1910
(شاعر السنديان، من ألمع شعراء الزجل، من بلدة سبعل في قضاء زغرتا القرية اللبنانية ملهمة السبعلي بأبنائها وجغرافيتها، انسانها وجمادها، بقي هائماً بها طوال حياته وقد انتقلت الى شعره لتحيا وتخلد. منشئ مجلة «السبعلي» الزجلية (1938) . دواوينو المطبوعا ومفقودي من السوق: حكايات- عطور من لبنان- هادا لبنان- سلوا- دمعة السبعلي ومنجيرة الراعي.)

شهر العنب!
أسعد السبعلي

وآب، يا شهر العنب والتين
عنقودك المشقّر لو طلّي
والكرم عميضحك لهالحلوين
هالكل حلوي بايدها سلّي
وعالشطوح سلال، حد سلال
لجمامها بالتين ملياني
وكل سلّي الشهد منها سال
وتشرّحا، صابيع سكراني
ويفز هالدوري عن القرميد
وكل فرخ بيعزم التاني
عموسم غناني وحفلة عيد
وشمّة هوا بعب السندياني

*

نهر

عطشت الأرض، ومرق كانون، وما شتت الدني بعد، والفلاحين بدن يزرعو.. صارو يصلّو وزنرو الكنيسه.. زعلت كتير لمن شفت النهر عطشان، والطاحوه واقفه، والطحان عينو بالسما..صبحتو وقلتلو: قولك هالغيمة في وراها شتي يا بو سعيد؟ هز راسو وقلي: مش هيئتها رح تشتي..

عطشان.. فحّم قلبك، برابك عفير
والنمل عا دربك زحف جيشو الغفير
وما عاد صرلا صخرتك تكسر عطش
الكانت عليها تهل موجات الحرير
الطاحون عينو بالفلك طحّانها
اشتاقت عا رش البودره حيطانها
الدلبه العتيقه تغيّرت ألوانها
اصفرّ الورق .. لا صوت فيها ولا صفير..
العلّيق لونو تغيّر وخدّو عبق
اجردت قميصو وحلّ علاغصن الحلق
ومنجيرة الناطور عا كتف الشفق
تتنهد وتبكي متل طفل الزغير
يا نهر، بكرا عليك بتطوف الدني
لا تستحي بالفقر.. بكرا بتغتني
وبتعود للألوان والعيش الهني
وتملى السما طاحونة الضيعه هدير!..

*

الزيتوني

يا ضارب، العمتطعمك خيراتها
جناحا، بمفراطك، كسرتو شو السبب
مشّق بإيدك عالهدا حبّاتها
اياك تجرح غصن حاملّك دهب
وانتو يا لّمامات، لا تقصّو عروق
من غصونها، تا تشكلو حروف السلال
وروق يا ضامت، ع أم النور، روق
جانح المنو خير، قصفو مش حلال
ولا تمنع العفّار، لا تسد الطريق
هلّي صابيعو دمها عالشوك سال
بالبيت نقطة زيت ما في بالبريق
ولا في على الله وعليها الاتكال

1 thought on “من قصائد أسعد السبعلي – شهر العنب! – نهر – الزيتوني

  1. شكرا كتير كتير
    على ها الشعر الحلو للسبعلي
    ها الشعر يلي بخلينا نطير فوق الغيم ونشم ريحة تراب الأرض ونشتهي شوفة الخضار والجبال ونتنمنى نرجع تنزور الضيعة والأهل مرة تانية
    بتمنى تضلوا تكتبولنا من نتاج الشاعر أسعد السبعلي
    لانو كتاباتو كتير حلوة ومش عم نقدر نحصل عليها
    شكرا مرة تانية

    إعجاب

اترك رد

Please log in using one of these methods to post your comment:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s