من قصائد أسعد سابا – جايين يا أرز الجبل – زورها بكير – يا ابني


أسعد سابا (1913 – 1971)، من كبار شعراء الزجل، شاعر الأرز والضيعة وأمجاد لبنان، شاعر العفوية والإلهام والسحر. نظم الزجل ونشر الشعر العامي في الدوريات الزجلية مثل «العندليب» و«أرزة لبنان» و«الزجل اللبناني» و«صوت الجبل» و«منجيرة الراعي». من أعضاء «رابطة الزجل اللبناني» (1942)، رئيس «عصبة الشعر اللبناني» المنشأة في 22 نيسان 1950. وهو مؤسِّس «جوقة بلبل الأرز» (1936) ومنشئ مجلة «مرقد العنزة» الشعرية السياسية الأسبوعية التي استطاعت أن تستقطب اسماء كبار الشعراء والأدباء (مثال الياس أبو شبكة وصلاح لبكي وعمر فاخوري ورئيف خوري وفؤاد أفرام البستاني وأسعد السبعلي وسواهم). رئيس «جمعية الزجل اللبناني» (1940)، ومراقب الشعر في الاذاعة اللبنانية سبعة عشر سنة 1947 – 1964

جايين يا أرز الجبل

كلمات: اسعد سابا

جايين يا أرز الجبل جايين اشتقنا لجبل نيحا لجبل صنّين
تحت السّما ما في متل لبنان لبنان أحلى وجّ أعلى جبين

اشتقنا على بعلبك وقلعتها اشتقنا لزحلة لجرن كبّتها
لبيت شْباب لإهدِن لحَصرون لصوفر لعالَيه لبحَمدون
لجزّين للباروك لبعـَقلين

اشتقنا لفالوغة لحَمّانا للشّوير لبشرّي برمّانة
لبيت مري لسبعل لبكفيّا لغوسطا لمايروبا لفاريـّا
لتلّة حريصا لصخر قنّوبين

اشتقنا لبسكنتا لعنطورة لرَيفون لعْجلتون للكورة
لعِبرين لبكاسين للبترون لعكـّار لحراجل لمرج عيون
لقرطبة لجونية لتنّورين

اشتقنا لغزير لعنجر لدرعون ليحشوش للقبيّات لبشامون
غبالة وحملايا العاقورة دلبتا الغازيّة النّاقورة
لحومال لبعبدات للقطـّين

اشتقنا على سهيلة وعلى عرَمون اشتقنا لانطلياس لبدادون
للنبطيّة لجون لجديتا للحدث لمغارة جعيتا
لبيصور عين عْنوب عنتورين

اشتقنا لعين تراز عين دارا لكفور وراس كيفا ومزيارة
دفّون عين زحلتا لبدنايل لنبع الصّفا لمشمش لقرنايل
لبسوس راشانا ولِبْتَغرين

اشتقنا لمغدوشة لصيدا وصور لسوق الغرِب لجْبيل للدّامور
للوادي كفرشيما لخنشارة الشّويفات وبعبدا المختارة
لعيتنيت لبيت زود لَصَغبين

اشتقنا لراشيّا للمريجات لبولونيا لبجّة للقليعات
ولفيطرون لمشغرة لعشقوت ولعاصمة لبناننا بيروت
لطرابلس للدير لبتدّين

جايين بدنا نسكن بلبنان ونعيش تحت جوانحه أخوان
لبنان أول بيت للانسان غاب السّباع وجنة الحلوين

تاريخ: 1961

زورها بكير

كلمات: اسعد سابا

واحكي لها ياما انشغل هالبال
من حرقة الفرقة
وهالقلب عالورقة
ماعاد عنده للحكي راسمال

روح زور ياليي بينها وبيني
صد وحكي وسيوف
ولو عملت هالمعروف
بسقيك بدل المي من عيني
زورها بكير ياعصفور

روح قول لها عني صباح الخير
لعند ال بحبها طير
جيب لي خبر بكير
حبات قلبي لاطعمك يا طير
تاريخ: 1961

يا ابني

كلمات: اسعد سابا

بيّك موصّي لك قبل ما مات بلادك صلاة للحب صلّيها
لوعليها ثقلت الحملات وشي عين غدر اتطلّعت فيها
مثل الأســد خليك بالحزّات صرخة بطل عالكون وديها

يا ابني بلادك يوم طلّ النور ضوّت نجومه عا روابيها
والمركب الأول القص بحورفيلك شراعه من شواطيها

أرزاتنا مـــــــرقت عليها دهور وبــعـــدنا منكبر بماضيها
خضرا عكتف جبالنا ناطور جنون العواصف ما بيلويها

يا ابني بلادك جنّة الانسان بصوتك يا بلبل ضل غنيها
تنقل ما بين الورد والريحان وحكايتك للساقية احكيها

خليك يا ابني عالوطن سهران وعين اللي بيجيها النوم وعيها
وكلّ شـــــبر بنذر من الأوطان أرضك لابنك بس خـــــلّيها

يا ابني السما تضحك لك وتحميك وتضل درب العز تمشيها
وتلّة الأرزة نســـــرها تسـمّيك وجـــوانحك عالريح عليها
والغار كل مواســـــــمه يهديك وافكارك قناديــــل ضوّيها
عالشـمس خلّي حلمك يودّيك وادراج فـــوق ادراج تبنيها
ويوم الرجوع بلادك تلاقيك وعنّك اخبار المجد ترويها

تاريخ: 1967

اترك رد

Please log in using one of these methods to post your comment:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s