من قصائد أسعد السبعلي – طقمي الوحيد – ارجعلي

أسعد السبعلي
1998-1910
(شاعر السنديان، من ألمع شعراء الزجل، من بلدة سبعل في قضاء زغرتا القرية اللبنانية ملهمة السبعلي بأبنائها وجغرافيتها، انسانها وجمادها، بقي هائماً بها طوال حياته وقد انتقلت الى شعره لتحيا وتخلد. منشئ مجلة «السبعلي» الزجلية (1938) . دواوينو المطبوعا ومفقودي من السوق: حكايات- عطور من لبنان- هادا لبنان- سلوا- دمعة السبعلي ومنجيرة الراعي

***

طقمي الوحيد

( أسعد السبعلي )

حكاية هالقصيدي

حكاية هالطقم صحيحه، ما تغسل نهار، زهقت منو، وزهق مني، وما كنت اقدر غيرو .. الحاله تعبانه معي كتير ! .. ومره كنت لابسو بتجيني دعوة انا وأسعد سابا عَ القصر الجمهوري بْ بعبدا
من قِبَل رئيس الجمهوريّة، وبآخر البطاقة مكتوب عبارة ” بالّلباس الرسمي للمدنيّين وبالبزّة العسكريّة للعسكريّين ” وقتها سمعت كلمه من موظف كبير شايف حالو بطقمو قال : ” لازم الدوله تشتري طقم السبعلي وتحطو بالمتحف ” سمعت هالكلمه ورجعت عالبيت وكتبت هالقصيده :

عتّق عليـــك العمــــر يا طقمي الوحيد
انحــلّْ خيطــك والفـــرج بعــــدو بعيد
فكــري لهمـــني بالمتــاحف أعرضك
بيشــتروك … وبلبــس بحقّــك جديـــد
***
لو في بدل عنّك .. عرضتك من زمان …
ســيرك منسّـــل , وجّــك مغبّـش كمـــان
صــــارت الرقّعـــــات فيــــك مرقّــــــعا
تفيّـــق معي , لونك الأصلي كيف كان !
***
لو جيـت تــا أكـــويك ما بتحمــل كـوي
نـــازل خميـــري متـــــل تين المستوي!
ما فيــــك تشــــفع فيك غيرْ كلمة نضيف
ونضــيف نوعيـــن المعـــــاني بتحتوي
***

تنـــية جــــريك بتشـــبه سنان المشاط
يا رفيق عمري عم تفرّم من جديد ؟؟؟
وقـدّ ما تْبَكّل عَ خصــرك ها لقشـــاط
دابت عَ كتـــر الشـــدّْ زردات الحديد !
***
مورّمي ركــــابك متـــل بطـــــن البريق !
هيـئـتــك منفــــوخ منّـــــي يــــا رفيــــق ؟؟
انْ رديت إيـــديّي لــــــورا … مـــش كبـريا
صرت مهري … بخاف تقشط عَ الطريق ! ..
***
صــرت ” أنتيـــكا ” .. وصورة عمر فيك
ليــش الحكــــومي شــالتك من بالها ! ؟؟؟
لازم لمتحـــفها يـــا طقـــمي تشــــــتريك
رمـــز الأديـــب بعهـــــد إســــــــتقلالها …

ارجعلي

( أسعد السبعلي)

كنت قاعد ع السطح تذكرت بو جميل قمت نزلت كتبتلو بي بي الغربة ارجاع تنعيش هاليومين سوا:

قولك بعد بنعمر السكرا
تحت فيات السنديانة
قولك بيرجع هالحلو بكرا
و تضحك بوجو قلوب زعلانة

سطيحتنا حلفت ع الكيف
و ع لعب الترس و السيف
و الدبكة و صلب القيمة
و ان ما طليت بهالصيف

ارجعلي حاج الدّمع يهل
و عيوني ع البحر تدل
قوس النصر بننصبلك
لمن ع الضيعة بتطل

و لمن بيقولوا طليت
بدي نوّر سطح البيت
و اهل الضيعة تيلاقوك
رح اعزمهن بيت و بيت

اترك رد

Please log in using one of these methods to post your comment:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s