من قصائد خليل روكز – رباعيات – في المروج

رباعيات – للشاعر خليل روكز

 
* السيجارة *
كلك خسارة ظاهرة وشربك حرام *** بتسرقي من الجسم شي ما بينسرق
يا ما جبرتي ناس من خاص الكرام *** يسألوا الشحاد عنك لو مرق
واكتر من العيش في الك احترام *** يا رفيقة القهوة ويا اخت العرق
بتحرقيني وفي الك عندي غرام *** عن غرام العامري ما بينفرق

* حبة عنب *
بنت شقرا وعلقت بدين العبيد *** ومع امها ما كملت مشوارها
وصاروا عليها شيل ايد وحط ايد *** تاخبصوها وجارها ما جارها
ونزلوها في براميل الحديد *** يا ويلهن مش عارفين اسرارها
ومن بعد مية الف غلوة عالوقيد *** دمها بيعود ياخد تارها

* الحسود *
من تراب الأرض كمشة الرب شال *** وحط فيها مي من عين الطمع
وشال منها الجاذبية والجمال *** وفوقها لعنات دهرية جمع
وصبها انسان معدوم الكمال *** لا بيشبع ولا دينتو بتشبع سمع
ولزق عاوجهو وجه سيفورس وقال *** ما حدا غيرك عدو المجتمع

* الطبيعة *
انت شلحتيني غريب بهالديار *** عأرض فيها ما الي مفلش حصير
عطيني صبر أيوب من فضلك نهار *** ومني خذي برق ورعيد وزمهرير
عطيني عقل طفل وبساطة اختيار *** واستقرضي من خاطري وخز الضمير
عطيني بمشاع الأرض مطرح للعمار *** تاعمرو وباركلك بكلمة فقير

 

*الغني والبخيل *
وحدك انت ماشي على درب الأصول *** ويحكو البشر ابقى مسكر مسمعك
مهما عملت ما بتقنع صحاب العقول *** والحكي لا بيضرك ولا بينفعك
صحة وهنا عاقلبك تبحبح وكول *** رزقك الله شو دعوة العالم معك
ولما حدا بيطالبك لازم تقول *** مثل ما الله شبعني بيشبعك

* صوت نفسي *
مثل صهلة مهر جن بلا لجام *** يما جبل من فوق شي وادي حني
او مثل زأرة نمر بوادي العظام *** يما مثل هدرة حجار المطحني
او مثل سكرة غول من بعد صيام *** يما مثل شخرة طبيعة مسودني
او مثل شي مارد خلع باب النظام *** وعميصرخ من بعيد تايهز الدني

*************

خليل روكز-في المروج

مسا هالليل يسعدلي صباحو
          انجلى وعن جبهتو الغيمات راحو
وصرنا نشعر بنسمه طريه
          برعشتها عطور الذوق فاحو
اشمخي يا ارض عالوادي الغنيه
          بجمالك كل اهل الكون ساحو
انا الحامل خطايا المجدلية
          جروحي غير فيك ما ارتاحو
انسمى الصفصاف شجره مستحيه
          امانيها عفقد التمر ناحو
وصفصافة صحاب المعنويه
          العقل بقلبها بيوجد نجاحو
يا انصارنا عن صدق نيه
          انتو لشعرنا الزجلي سلاحو
وانتو جناح طير الشاعريه
          وشو نفع الطير لولا من جناحو
خلق لبنان بالدنيا لغايه
          غاية حب ما الها نهايي
خلق عا تلة الدنيا مناره
          ارتدى من الزنبق الابيض عبايي
على رواسيه تلج من الطهاره
          وعلى شواطيه موجات العنايي
موجه حاملي منا حضاره
          وموجه بتمها عنا حكايي
اذا السايح عمل النا زياره
          ومن بلادو اجا مشوب كفايي
ان دخل لبنان بتصفي الحراره
          برد والبرد لازملو دفايي
بلادي اسمها مهد الشطاره
          ومن بلادي انتشر حرف القرايي
بلادي بمعصم الدنيا سواره
          لبستها الطبيعه من البدايي
بلادي كون والمعمور حاره
          لها في كل دولة مجد رايي
بلادي تلالها السمره عذارى
          خاطبهم اله اللا نهايي
بلادي اهلها مرد وامارا
          نسبها من الفنيقيين جايي
        اسألوا شمس المجره بالاشاره
          بتجاوب انا حلوه ولكن
                     حلا لبنان اجمل من حلايي            

الإعلانات

اترك رد

Please log in using one of these methods to post your comment:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s