من قصائد طانيوس الحملاوي : واقف ع شط البحر- حكيلي يا جدي

طانيوس الحملاوي ( 1912 – 1996 )

شاعر زجّال من مواليد ضيعة حملايا ، ألّف في بداية مسيرته الفنّية جوقة للزّجل أسماها “الكنار” ، ثمّ ما لبث أن انضمّ الى جوقة شحرور الوادي أسعد الفغالي عمّ الصبوحة ومن بعدها عاد وألّف جوقة جديدة أسماها “المنتخب” . رئيس تحرير مجلة «الشعلة» (1955 – 1970) الشهرية في الزجل والسياحة والشعر والاغتراب والرياضة لصاحب امتيازها فاضل سعيد عقل. وهو صاحب «العصبة» ورئيس تحريرها (1971).

واقف ع شط البحر

واقف ع شط البحر بكّاني السفر

مين قدّي تلّوع وقدي نطر

مع كل موجي رايحا ببعت سلام

ومع كل موجي راجعا بنطر خبر

من وقفتي، الرملات عرفوني غريب

بتسهر معي النجمات وبترجع تغيب

بيصعب عليّ عود من غير الحبيب

ونرحت صوب البحر قدامي خطر

وما كنت المح لا سغيني ولا قلوع

ما شوف الا غيوم جايي من طلوع

بينزلو يعبّو من عيوني دموع

وكل ساعا بيعملو سحبة مطر

وكل ساعة هجر أطول من سنى

وما حدا بهالكون عارف شو بني

نهد حيلي. صرت ماشي منحني

بأول شبابي وبيّن عليّ الكبر

 

حكيلي يا جدي

احكيلي يا جدي الختيار احكيلي بأيامك شو صار

انت وستي كيف كنتو لمن كنتو ولاد زغار

خبرنيي لمّا كبرتو وسوا بالهوا طرتو

كيف حبيتو وكيف صرتو

وستي كيف تغار عليك

وميّة ناطور حواليك

وعليها من النسمي تغار

وع التلي الحد الغيمي

وقت اللّي قمت القيمي

شو كانت حلوي الخيمي

هي ترميلك تفاحا

والصبايا بالساحا

هي نهديك الورد غمار

وكيف تمضّو السهريات

وحزازير وخبريات

رقص ودبكي وحكايات

وقديش خبّارك حلوين

قديش كنتو مرتاحين

ما منشبع من هيك خبار